Ils trens tranter Realp en il chantun Uri e Ulrichen en il Vallais circuleschan puspè normal. Quai ha la Matterhorn Gotthard Bahn communitgà. Il venderdi eran dus trens collidads. Indesch persunas èn vegnidas blessadas.
Raschuns n'èn anc betg enconuschentas
Davart la raschun ed ils donns che l’accident ha chaschunà na dettia naginas novas infurmaziuns. Emprimas examinaziuns sajan gia vegnidas fatgas il venderdi sin il plaz da l'accident. Ils dus trens donnegiads han ins pudì trair sonda suentermezdi ord il tunnel tar Oberwald en il Vallais. Quai ha ditg in pledader da la viafier.