Il mument discurria la partida cun pliras dunnas, ha ditg la co-presidenta da PS Dunnas, Natascha Wey. I na saja però anc betg il mument da numnar nums, ha ella concludì. La successura u il successur da Levrat duaja vegnir elegì il di da partida l’entschatta d'avrigl a Basilea.
Masshardt na vul betg
La cussegliera naziunala dal chantun Berna, Nadine Masshardt ha scrit via Twitter ch'ella na stettia betg a disposiziun per il presidi da la partida. Ella stettia però vinavant a disposiziun sco presidenta da la fracziun PS Svizra e veglia sa focussar sin sia lavur en il parlament.
Jon Pult vul dar precedenza a dunnas
Sco successura pussibla u successur pussibel numnan las medias sper Nadine Masshardt, er Mattea Meyer da Turitg sco er ils dus umens, Cedric Wermutz da l'Argovia ed il Grischun Jon Pult.
Gust avess jau schon, ma suenter Christian Levrat dovri ina dunna a la testa da la partida.
Il presidi da la Partida socialdemocratica saja uss stà occupà 20 onns dad umens, di Jon Pult. Era sch'ils posts entaifer la partida sajan uschiglio repartids gulivamain tranter umens e dunnas, saja cunzunt relevant il presidi.
En quest temp da midadas, cura ch'il pajais spetgia dapli impuls verds e dapli impuls da dunnas, stoppia la Partida socialdemocratica avair ina dunna a la testa. Jon Pult po dentant s'imaginar da candidar lura pli tard ina giada per il presidi da partida.
Critica ord atgnas retschas envers Levrat
Tar las elecziuns dal Cussegl naziunal l’october 2019 avevi dà ina schleppa per ils socialdemocrats. Els han pers quatter sezs ed uschia realisà il mender resultat dals ultims 100 onns. Silsuenter hai dà pretensiuns per ina midada a la testa da la PS. Plirs collegas da partida han pretendì avertamain la demissiun da Levrat, tranter auter Jacqueline Fehr, la cussegliera guvernativa da Turitg.
Christian Levrat sa retira la primavaira sco president da la PS. El na vegnia betg a candidar per in’ulteriura perioda d’uffizi. Quai ha el ditg en intervistas cun las gasettas «Blick» e «La Liberté». Levrat ha 49 onns ed è dapi 12 onns president da la PS.
Levrat sez è vegnì reelegì en il segund scrutini en il Cussegl dals chantuns dal Friburg – cun grond avantatg.
RR novitads 06:00+