La notg passada ha stremblì la terra datiers dad Einsiedeln al Wägitalersee en il chantun Sviz. Il terratrembel haja gì ina fermezza da 4,4 sin la scala da Richter, ha communitgà il Servetsch seismologic svizzer. L’epicenter saja stà datiers da la surfatscha. I saja bain pussaivel ch'il terratrembel saja stà da sentir en grondas parts da la Svizra. Sch'i ha dà donns n'è fin ussa anc betg enconuschent. Annunzias davart donns n'haja fin qua betg dà.
La raschun per il terratrembel pudess esser la ferma plievgia dals dis passads, e betg la tectonica da las Alps. Aua possia sfundrar spert en la profunditad tar grippa che laschia tras tgunsch aua, sco quai ch'i saja il cas tar las Alps. E quai possia lura chaschunar terratrembels, declera il Servetsch seismologic svizzer.
Mintga di fin 4 terratrembels – fin 1500 per onn
Il Servetsch seismologic svizzer registrescha mintga di trais fin quatter terratrembels en Svizra ed en l'exteriur datiers dals cunfins cun la Svizra. En in onn registrescha il servetsch 1'000 fin 1'500 stremblidas. Da quests terratrembels senta la populaziun dentant be 10 fin 20. Tschellas stremblidas èn memia flaivlas per sentir ellas.
Dapi il cumenzament da l'onn 2024 ha il Servetsch seismologic svizzer registrà gia 756 terratrembels.