Suenter la ferma plievgia e naiv en ils chantuns Vallais, Tessin e la Part Sura Bernaisa è la situaziun sa calmada. La saira dal venderdi sontg ha la regenza vallesana lura annunzià d'abolir la situaziun speziala. Ils dachasas en il Vallais sco er en la Part Sura Bernaisa hajan per gronda part, suenter interrupziuns pli lungas, puspè forza electrica, communitgeschan las autoritads.
La gievgia avevan las autoritads proclamà en il Vallais la situaziun speziala. Cun quella èsi pussaivel d'impunder meds supplementars ni l'agid da l'armada per cumbatter las consequenzas da las malauras.
-
Bild 1 von 5. Bildquelle: RTR.
-
Bild 2 von 5. Bildquelle: Keystone.
-
Bild 3 von 5. Bildquelle: Keystone.
-
Bild 4 von 5. Bildquelle: Keystone.
-
Bild 5 von 5. Las vegnas ch'han gia chatschà èn uss curcladas da naiv. Bildquelle: Keystone.
Impressiuns da Saas-Grund ch'è isolà dal rest dal mund
En il Vallais pon ins propi discurrer d’in caos da naiv. Oceana Galmarini è producenta dal Telesguard ed è actualmain a Saas-Grund per diversas emissiuns da SRF. Gievgia suentermezdi ha ella ditg, ch'i naivia fitg ferm – tenor ella saja quai ina atmosfera speziala en la vischnanca. I ha dà enturn 60 centimeters naiv ed entras quai è il privel da lavinas grond.
Il problem è ch’ins na sa betg sche lavinas grondas èn vegnidas giu. Ils pumpiers restan en vischnanca perquai ch'igl è era per els memia privlus dad ir ordvart la vischnanca.
Vitiers vegn che l’electricitad è stada interrutta dapi la damaun las tschintg. Er suenter hai anc dà interrupziuns. Oceana Galmarini ha pudì chargiar ses telefonin e computer tar ils pumpiers. Era la communicaziun da la rait è per part stada interrutta. La populaziun è vegnida infurmada via chat tge che capita. Ils indigens sco er ils giasts a Saas-Grund prendian questa situaziun dentant cun calma. Els èn gia disads ch'i naiva magari ferm e che las vias vegnan lura serradas.
Er ils chantuns Berna e Tessin èn stads pertutgads
Pertutgà da la plievgia e naiv è er la Part Sura Bernaisa stada. Var 40 annunzias hai dà tar la Polizia chantunala bernaisa en connex cun las malauras. Las annunzias èn cunzunt plantas u roma sin las vias. Da persunas feridas n'èsi enconuschent nagut a la polizia. Plirs trajects da traffic èn stads serrads. Era la rait mobila è stada disturbada. Lieus pli pitschens en il Saanenland, il Simmental, il Kandertal u en la regiun da Grindelwald èn stads senza forza electrica.
En il Tessin èn creschids ils livels da l'aua dal Lago Maggiore sper Locarno sco er il livel da la Maggia a Locarno. Cunquai che las precipitaziuns èn tschessadas en il decurs da la gievgia n'han betg dà in pli grond privel pervia dals nivels d'aua.