Siglir tar il cuntegn

Header

cuntegn

Suenter las restricziuns Svizzers dattan puspè or dapli daners en l'exteriur

Las Svizras ed ils Svizzers dattan puspè ora marcantamain dapli daners per viadis en l'exteriur - quai suenter dus onns restricziuns. Dal schaner fin l'avrigl han Svizras e Svizzers dà ora dubel uschè blers daners a l'exteriur cumpareglià cun l'onn avant. Quai è schizunt in terz dapli che l'onn 2019, il temp avant corona. Las cifras sa basan sin pajaments cun cartas da credit e da debit.

Surtut l'Italia e la Frantscha profiteschan da quest effect, sco il monitoring «Consumption Switzerland» mussa. Dentant na profiteschan betg tuts dal viagim dals Svizzers.

Pli strentgas mesiras da corona en Germania

En Germania èn las expensas però anc adina 9% sut il nivel da l'onn 2019. Surtut il turissem da cumpra para dentant anc betg d'esser sa revegnì cun bunamain 10% pli paucas entradas cumpareglià cun il nivel d'avant la crisa. Tenor ils auturs dal monitoring è quai probabel da declerar cun las restricziuns che han valì pli ditg e ch'èn stadas pli strentgas en Germania. Dapi ch'era ils Tudestgs reduceschan las mesiras, dattan las Svizras ed ils Svizzers puspè or dapli daners en la Germania.

RTR novitads 12:00

Artitgels legids il pli savens