Tina Turner è morta en la vegliadetgna da 83 onns, quai suenter ina lunga e greva malsogna da cancer ed in culp dal tscharvè. Dapi blers onns ha ella gì domicil a Küsnacht ed aveva la naziunalitad svizra.
La vita da Tina Turner – cun auts e bass
Ella è naschida ils 26 da november dal 1939 a Brownsville, Tennessee, sco Anna Mae Bullock. Là è ella creschida sco feglia d'ina famiglia che racoltava mangola e quai durant il temp da la separaziun da las razzas en ils Stadis Unids da l'America. Sias emprimas experientschas musicalas ha ella fatg en in chor da baselgia. Il 1958 cumenza sia carriera sco chantadura ensemen cun ses emprim marì Ike Turner. Lur emprims hits èn «Nutbush City Limits» e «River Deep, Mountain High», veritablas perlas dal soul da quels onns.
Success solo 45 onns
Malgrà il grond success dad Ike e Tina Turner datti il 1978 il divorzi, er perquai che Ike era savens violent. Sia carriera va a fin – quella da Tina cumenza gist endretg e sia vusch cun ina forza enorma ed expressiva daventa enconuschenta sin l'entir mund. Ils onns 80 è ella ina da las chantaduras cun il pli grond success, venda passa 200 milliuns albums, survegn discs d’aur e platin per ses success e ramassa premis e distincziuns - sco per exempel 12 Grammys.
