Il signal da las Svizras ed dals Svizzers era pli che cler. 64% avevan mess in Na en l’urna il 2021. Quai dentant betg perquai ch’i na vesevan betg il basegn per ina identitad electronica mabain perquai che la gronda maioritad na vuleva betg surlaschar quest instrument ad in consorzi da bancas, segiradas la Swisscom ed la Posta Svizra.
Els hajan emprendì dals sbagls, di il Cusseglier naziunal Mauro Tuena da la PPS. Tar il project actual n’hajan las interpresas privatas betg il lead. «Tut è en la cumpetenza da la Confederaziun ed er en lez mauns.»
Tut en maun da la Confederaziun
Vul dir che la Polizia federala controllescha la correctadad da las datas e dat era ora la e-ID. E la lescha per realisar la e-ID fetschia quai cun proteger uschè bain sco pussaivel las datas sensiblas dad in e scadin, accentuescha il Cusseglier naziunal verd Gerhard Andrey che ha la davosa giada cumbattì vehementamain cunter la e-ID privata. Il project saja cler ed focusseschia sin l’incumbensa cardinala da la Confederaziun. «Numnadamain d’equipar nus cun documents autentifitgads sco quai che nus enconuschain quai da la carta d’identitad.»
Il sustegn en il Parlament federal è perquai er fitg grond. Per tuttas fracziuns è cler che la Svizra sto en il sectur da la digitalisaziun far vinavant e la e-ID è qua in element fitg impurtant.
Gerhard Andrey numna per exempel las bancas nua ch'i duai esser pussaivel il futur, forsa gia en dus onns, d’avrir in conto cun in pèr paucs clics, quai grazia la e-ID. Mo i duai er uschiglio ir tut pli simpel e pli segir. Per exempel sch’igl è necessari da verifitgar la vegliadetgna. «Cun la e-ID è quai pussaivel a moda absolut anonima, senza laschar enavos fastizs electronics.»
Cumpatibilitad internaziunala duai suandar
E co vesi ora cun la cumpatibilitad internaziunala? Pon ins a partir dal 2026 laschar a chasa la carta d'identitad u il passaport sch'ins va en vacanzas e sa fidar da la app sin l’agen telefonin? Mauro Tuena è qua sceptic. Quai saja er stada ina dumonda tar els en la cumissiun. Quai saja plitost difficil. «Natiralmain duain ins ir en questa direcziun perquai che quai è il futur. Ma betg gist damaun u puschmaun.»
Ma avant sto ussa anc il Cussegl dals chantuns s'occupar da la e-ID. Cunquai ch'ils chantuns han gia signalisà lur sustegn per la lescha n’èsi il mument betg da quintar cun gronda resistenza.