La plievgia ha laschà crescher il livel da flums en Svizra. Tenor SRF è la situaziun critica a Genevra, Basilea ed a Gstaad. Là en plirs auals culads sur la riva.
L'Arve, in flum lateral da la Rhone, a Genevra ha cuntanschì tenor indicaziuns dad SRF Meteo oz en damaun in record da deflussiun. La damaun sajan culads 956 meters cubics aua per secunda; quai saja dapli che tar las malauras dal matg 2015.
La raschun saja sper la blera plievgia er il cunfin aut da naiv ed uschia l'aua da naiv. Plinavant èn tschintg punts sur il flum a Genevra restadas serradas per autos e peduns.
A Basilea ha il Rain cuntanschì la marca la pli auta. ll traffic da bartgas saja perquai interrut tranter Rheinfelden e Kembs en Frantscha, uschia las autoritads. A la riva dal Rain a Basilea ha la polizia drizzà en zonas scumandadas da passar.
Il livel d'aua saja dentant sa sbassà sur notg. Ed er la Reuss a Melingen (AR) saja gia puspè vi da sa sbassar.
Ier e la notg sin oz hai pluvì intensivamain en blers lieus da la Svizra. Il servetsch d'avertiment da la Confederaziun, Alertswiss, ha avertì d'auas grondas en plirs lieus.
A Genevra tar l'Arve vala il nivel da privel il pli aut. Grond è il privel d'auas grondas er per lung da la Broye en ils chantuns Friburg e Vad, sco er en il Vallais Sut.
Situaziun sa calma
Tenor Gaudenz Flury da SRF Meteo sa calma la situaziun la mesemna. Il vent e la plievgia vegnan pli flaivlas. La gievgia resti per il pli sitg. La notg sin venderdi vegni puspè burascus. Il cunfin da naiv è dentant pli bass, uschia ch'ils flums mainan pli pauca aua.