- L'autostrada A2 è puspè vegnida averta la notg
- Via sur il Pass dal Gottard è serrada
- Val d’Ursera è dentant cuntanschibla
- Via d’access nà da Göschenen ad Andermatt, Hospental e Realp è averta
En il chantun Uri è l'autostrada A2 puspè vegnida averta la notg. Pervia dad inundaziuns e perquai che la Reuss smanatschava dad ir surora eran parts da quella vegnidas serradas sonda cumplettamain.
La via sur il pass dal Gottard è serrada ad interim. La notg passada n’haja l’aura betg lubì da cumenzar cun las lavurs da rumida. Ed er oz, dumengia na possian ins betg lavurar sin la via tranter Hospental en il chantun Uri ed il Pass dal Gottard, scriva l’Uffizi federal da vias. Il pli baud damaun saja quai pussibel da cumenzar cun las lavurs da rumida.
Tenor SRF Meteo hai pluvì en il Tessin la sonda dapli che uschiglio l'entir mais d'october. A Mosogno per exempel eran quai dapli che 300 millimeters. Er en tschertas part dal Grischun e dal Vallais hai dà plievgia da record.