Da chalar na saja mai lev, di Johannes Flury ch'è dapi bunamain diesch onns president da la Pro Raetia. Mo sche la glieud manchia, saja il pli prudent da chalar e d'investir las forzas en in nov project che da mantegnair insatge per tut pretsch. Il dumber da commembras ed da commembers saja sa reducids cuntinuadamain ils davos onns. Gia avant dus onns haja la suprastanza perquai tschentà la dumonda co i duaja ir vinavant cun la Pro Raetia. Il resun saja stà pulit cler, di Johannes Flury.
Dus terz era da l’idea che la Pro Raetia haja fatg buna lavur e ch’ella possia suenter 75 onns chalar.
Lunga istorgia
Fundada il 1949 era l'idea d'unir las differentas uniuns grischunas en la Bassa per uschia sustegnair il Grischun e sia populaziun en il temp suenter la segunda guerra mundiala. I regiva la tema ch'ils chantuns da la Bassa prospereschian e sa sviluppeschian vinavant e che las regiuns periferas e muntagnardas sco il Grischun vegnian a la curta, di Flury.
Là nua ch’i mancava insatge, ha la Pro Raetia adina empruvà da metter ensemen uniuns e forzas e da lura far insatge.
La Pro Raetia era per exempel ina da las fundaturas da l’ARGO, la Fundaziun grischuna per lavuratoris e dimoras per persunas cun impediments. Auters exempels nua che la Pro Raetia è stada inizianta u ha dà impuls impurtants èn la Pro Vrin u era il Forum economic dal Grischun.
Plattafurma da discussiun
Ils davos onns saja l'uniun lura daventada adina dapli era ina plattafurma da discussiun e lieu d'inscunter. A chaschun da las dietas champestras annualas ha la Pro Raetia per exempel tematisà il surpli da valur da la plurilinguitad u l'effect da parcs da natira sin l'ambient da viver da carstgauns e fauna e flora.
Nus vulevan sviluppar la Pro Raetia tar ina sort «Think Tank» per il Grischun. Mo nus avain vis che quai n’è betg fruntà sin in resun uschè positiv ch’ins avess pudì dir ch’i fa senn dad ir questa via.
El persunal saja era anc ussa persvas che in tal forum independent fissi era en l'avegnir dumandads. Mo per quai dovri era resursas, il sustegn da commembras e commembers, daners ed ina perspectiva.
Anc festivar il giubileum
Mo simplamain liquidar a la dascusa l'uniun na vul Flury e cun el la suprastanza betg. Era sche la radunanza da commembers decidia da schliar l'uniun il matg vegni quella anc a pudair festivar ses 75-avel il 2024. Ed a quella chaschun duai dar in sguard enavos sin tut quai che la Pro Raetia ha cuntanschia e prestà, tradescha Johannes Flury. In'idea saja da laschar far in film davart l’istorgia da la Pro Raetia.