Siglir tar il cuntegn

Header

video
Persunal da Swissport demonstrescha a l'eroport da Turitg
Or da Tagesschau dals 23.07.2022.
laschar ir. Durada: 1 minuta 12 Secundas.
cuntegn

Suenter protests Swissport n'è betg entrà sin il catalog da pretensiuns

Las pretensiuns ch'il persunal surchargià da Swissport fan, na sajan betg finanziablas. Quai ha l'interpresa per la spediziun a terra sin ils eroports ditg. Swissport n'è betg entrà sin il catalog da pretensiuns. Quellas surpassian era cleramain las cundiziuns dal contract da lavur collectiv dal 2019. Plinavant na tegnian ellas betg quint da la situaziun actuala da l'aviatica. Swissport saja dentant pront d'ademplir tschertas parts da las pretensiuns – sco per exempel la gulivaziun da la chareschia.

Discussiuns suenter squitsch dal persunal

Suenter ch'il persunal da Swissport ha protestà la sonda endamaun a l'eroport da Turitg era il management sa mussà pront per discussiuns. Il manader da partiziun da Swissport, Marco Bötschi, chapesch ch'i saja necessari da stgargiar il persunal en la branscha aviatica. Plinavant è el pront da discussiunar davart pajas ed il plan da lavur. El na vul dentant betg turnar tar il contract collectiv da lavur d'avant la pandemia.

Acziuns da protest a l'eroport da Turitg

Radund 150 collavuraturas e collavuraturs da Swissport, il pli grond speditur per terra da la branscha aviatica, han demonstrà a l’eroport da Turitg cunter cundiziuns da lavur malas. Cun tschivlots, «buhs» e placats pretendan els in nov contract collectiv da lavur, ed han dà in ultimatum al management da Swissport. Quai ha communitgà il sindicat per il persunal al plaun da la branscha aviatica SEV.

Flyers per passagieras e passagiers

Las demonstrantas ed ils demonstrants han distribuì flyers sin il terminal 1 a l'eroport da Turitg. Sin quel han els scrit che la fulla da persunal che las passagieras ed ils passagiers vesian là, na saja betg la raschun per eventual temp da spetga pli lung. I sajan simplamain memia paucas persunas che lavurian per dumagnar la fulla da vacanzas. Las collavuraturas ed ils collavuraturs da Swissport sajan surchargiads, la situaziun saja ina pretaisa.

Contract betg pli acceptabel

Avant in mais han ils sindicats schlià il contract collectiv da lavur actual. Quel era vegnì negozià durant la pandemia e prevesa tranter auter perditas da paja. Il contract na saja betg pli acceptabel. Ins stoppia turnar tar las cunvegnas d’avant corona, uschia il sindicat SEV. En il focus da las discussiuns stattan la paja ed ils uraris da lavur. Il management ha ussa temp da reagir fin la mesemna.

RTR novitads 11:00

Artitgels legids il pli savens