Siglir tar il cuntegn

Header

cuntegn

Suenter scandal AutoDaPosta Er BLS e SBB han retratg memia bleras subvenziuns

Las viafiers han budgetà memia paucas entradas ed uschia incassà memia bleras subvenziuns per il traffic regiunal. La viafier bernaisa BLS sto pajar enavos prest 44 milliuns francs e la SBB 7,4 milliuns.

Betg mo AutodaPosta, mabain er las viafiers BLS e las Viafiers federalas han retratg subvenziuns memi'autas per il traffic regiunal. Concret vai per metter a quint prestaziuns en las tariffas coordinadas «Libero» e «Z-Pass», sco quai che l'Uffizi federal da traffic communitgescha.

La viafier bernaisa BLS e sia firma Busland hajan survegnì stgars 44 milliuns francs memia bia. En lur offertas avevan las firmas budgetà memia paucas entradas. Chantun e Confederaziun avevan lura mintgamai gulivà ora la differenza. Las Viafiers federalas han uschia survegnì 7,4 milliuns francs memia bler. La controlla da finanzas da la Confederaziun examinescha uss ils cas.

Viafiers hajan constatà sezzas ils sbagls

La BLS sezza scriva, ch'ella haja chatta irregularitads ed instradà ina vasta elavuraziun externa dal cas. Ed er la SBB communitgescha d'avair constatà sezza il sbagl ed infurmà immediat l'uffizi federal per traffic.

RTR novitads 08:00

Artitgels legids il pli savens

Scrollar a sanestra Scrollar a dretga