Per l'emprima giada ha l'Uffizi federal per statistica examinà la carriera da giuvenils ch'han fatg in emprendissadi. Tenor quai entran 85% dals giuvenils cun emprendissadi il pli tard suenter trais mais en l'emprima plazza da lavur. Bunamain la mesadad dals giuvenils resta en il manaschi d'emprendissadi.
Radund 70% dals giuvenils restan durant ils emprims trais onns en l'activitad da gudogn. Bun in quart dals giuvenils cun in certificat professiunal federal, ch'eran in mez onn suenter serrar giu l'emprendissadi en ina plazza, turnan enavos en il sistem da furmaziun. Ubain ch'i fan ina maturitad professiunala u ina segunda scolaziun.
Difficultads sin il martgà da lavur
Er sche la maioritad dals giuvenils cun emprendissadi chatta svelt ina plazza, han intgins er fadia sin il martgà da lavur. 19% d'els èn aifer ils emprims 30 mais suenter l'emprendissadi almain ina giada registrads sco dischoccupads. Quai è surtut il cas en la Svizra taliana (38%) ed en la Svizra franzosa (28%). Percunter è questa cumpart en la Svizra tudestga cun 17% pli bassa che la media.
RR novitads 12:00