Er en auters lieus ha il vent sufflà cun fermezza d'orcan (vul dir cun dapli che 117 km/h): Pilatus (130 km/h), Säntis (129 km/h) e sin il Bantiger sper Berna (127 km/h). In zic damain han ils vents furià en la Bassa, uschia per exempel a Neuchâtel cun 103 km/h. Il stemprà duai anc durar fin mesemna. Per SRF Meteo èn spertadads da vent da 150 km/h pussaivlas.
Tar la polizia chantunala da Berna hai da radund dus tozzels annunzias. En plirs lieus han ins stuì rumir roma, plantas, crappa e glera da las vias. En muntogna è il stemprà stà accumpagnà da navada. En il Vallais e las regiuns da las Alps cunfinantas è il privel da lavinas grond. I vala stgalim 4, il segund aut stgalim da privel. En las autras regiuns da las Alps è il privel da lavinas considerabel (stgalim 3).
RR novitads 12:00