- La banca gronda Credit Suisse duai avair gì sur decennis clientella dispitaivla, tranter quels potentats e funcziunaris corrupts.
- Las renfatschas fa ina rait da retschertga internaziunala en il rapport titulà «Suisse Secrets».
Sut il titel «Suisse Secrets» rapporta ina rait da retschertga internaziunala da la clientella dispitaivla da la banca gronda. Las schurnalistas ed ils schurnalists sa refereschan a datas internas da la banca. Quellas datas haja la rait da retschertga survegnì d'ina funtauna anonima. Las datas mussian che la Credit Suisse haja er avert contos per glieud criminala. Sur onns haja la Credit Suisse acceptà autocrats, traffitgants da drogas sco er delinquents da crims da guerra e traffitgants d'umans sco clientella.
La CS refusa las renfatschas
La Credit Suisse ha prendì posiziun tar las renfatschas e refusa vehementamain quellas. Ils fatgs che vegnian descrits en il rapport «Suisse Secrets» hajan motivs istorics e giajan per part enavos fin ils onns 1940. En pli sa basian ils fatgs ad infurmaziuns fragmentaras e selectivas che sajan stratgas ord il context.
Per motivs giuridics na possia la Credit Suisse betg s'exprimer davart relaziuns cun clientas e clients.
Medias svizras sco Tamedia hajan desistì da far part a las retschertgas. La raschun: Dapi il 2015 smanatschia a schurnalistas e schurnalists che scrivan davart datas da bancas ina procedura penala.
