Superfoods: Alternativas indigenas

Bavrondas cun pulvra da Matcha u pauns cun sems da Chia. Ils uschenumnads Superfoods han plaunsieu era chattà lur plaz en ils regals dals grossists svizzers. Savens èn els da derivanza exotica. I dat dentant er alternativas pli localas, cun ina meglra ecobilantscha.

Sems da Chia cun ampuaunas Bild in Lightbox öffnen.

Legenda da maletgs: Ils sems da Chia sa scuflan cura ch'i vegnan en contact cun liquids. Colourbox

Èn Superfoods super?

2:21 min, Actualitad dals 21.06.2016

La regina dals superfoods, per uschè dir, èn ils sems da Chia. Els duain far schlanc ed avair in bun effect per la sanadad. Cumprovà n'è quai, tenor l' inschignera da victualias Marianne Botta, betg. Il semglin saja cumparegliabel cun ils sems da Chia. El saja dentant indigen, pli bunmartgà ed er pli perscrutà. Plinavant ha el er in effect cunter il cancer. Las cumponentas dals dus sems èn tenor Botta sumegliantas.

Ampuaunas empè da pumaraida da Goji

Er la pumaraida da Goji tutga tar ils superfoods. Tals cuntegnian franc ina gronda concentraziun da vitamin A,B,C ed E, sco er bleras antioxidanzias, declera Botta. Dentant datti era tar la pumaraida da Goji nagins studis che demussan, ch' i hajan in effect per la sanadad.

pumaraida da Goji Avrir maletg en lightbox.

Legenda da maletgs: Cun examinar la pumaraida da Goji han labors chantunals savens chattà pesticids u autras substanzas nuschaivlas. Pixabay

«Tge ch'è problematic tar quest superfood è, che la pumaraida po esser contaminada cun pesticids u autras substanzas nuschaivlas.» Ina meglra alternativa saja l' ampuauna. «Quest fritg è perscrutà fitg bain e cuntegn medemamain bleras antioxidanzias. Ampuaunas èn era bunas cunter il cancer.» Ultra da quai duain ellas sminuir la ristga da daventar memia gross u da survegnir diabetes.

Spirulina - in «superbooster»?

Microalgas che derivan da l'America Centrala u da l'Africa, sco per exempel Spirulina, valan sco «superboosters» per il sistem d' immunitad.

pulvra da Spirulina Avrir maletg en lightbox.

Legenda da maletgs: Tenor studis duai Spirulina sbassar il spievel dal colesterin ed er la pressiun dal sang. Colourbox

Cumprar pon ins ellas en furma da pulvra u er tablettas. Tenor Botta cuntegnan ellas blers proteins, beta-carotin, clorofil, fier ed er acid folic. «Tenor studis duai Spirulina sbassar il spievel dal colesterin ed er la pressiun dal sang.» Dentant sajan questas micro-algas charas e cuntegnan per part era materias nungiavischadas.

Rischcotschnas empè da pulvra da Matcha

Er la pulvra da Matcha daventa pli e pli populara. «Matcha è atgnamain ina ragisch che deriva da las Andas da Peru», uschia Botta. Ella valia sco med da potenza e duai augmentar la prestaziun dal corp e dal spiert.

satget cun pulvra da Matcha Avrir maletg en lightbox.

Legenda da maletgs: Damai che la ragisch da Matcha vegn pulverisada, van bleras substanzas nutritivas a perder Pixabay

Studis na datti dentant er betg. «En sasez pudess ins cumparegliar Matcha cun las rischcotschnas.» Il suc da rischcotschnas retegnia inflammaziuns, sustegnia il sistem d' immunitad ed è er buns cunter il cancer. El possia schizunt avair in'influenza sin la cundiziun e sbassar la pressiun dal sang.

RR Actualitad 11:00