Siglir tar il cuntegn

Svizra Supponì attentader Abdeslam tascha davant dretgira

L'attentader supponì da Paris Salah Abdeslam ha taschì tar si'emprim’interrogaziun entras la giustia franzosa. L’avrigl aveva ses defensur anc annunzià che Abdeslam veglia s’exprimer. Uss fa el dentant diever da ses dretg da taschair. L’interrogaziun è uschia vegnida sistida gia suenter curt temp.

A Salah Abdeslam vegn renfatschà terrorissem e murdaretsch.
Legenda: A Salah Abdeslam vegn renfatschà terrorissem e murdaretsch. Keystone

Il venderdi avantmezdi è Salah Abdeslam vegnì transportà en in convoi d'autos da polizia da la praschun en il palazi da giustia en il center da Paris. Era in helicopter ha surveglià il transport ord l'aria.

Tenor l'advocat d'Abdeslam veglia el s'exprimer pli tard. Ils investigaders franzos speran da survegnir da l'um da 26 onns indizis impurtants per ulteriurs plans d'attentats e detagls davart ils attentats a Paris dals 13 da november.

Abdeslam vala sco sulet survivent da la cella islamistica ch’ha commess ils attentats da Paris dal november passà cun 130 morts. El è stà en fugia durant quatter mais avant ch’el era vegnì arrestà a Brüssel ils 18 da mars. Il 27 d’avrigl era el vegnì extradì a la Frantscha.

RR novitads 15:00