Siglir tar il cuntegn

Header

cuntegn

Surpassà reglas da corona António Horta-Osório banduna la Credit Suisse

Il president dal cussegl d’administraziun da la banca Credit Suisse, António Horta-Osório è sa retratg da ses uffizi. Il cussegl d’administraziun haja nominà Axel Lehmann sco successur per immediat, ha communitgà la banca.

António Horta-Osório vegn cità en la communicaziun da la Credit Suisse, ch’el deploreschia ch’in pèr da sias acziuns hajan chaschunà problems a la banca.

Il banchier è sa retratg suenter ina investigaziun dal cussegl d’administraziun. Concret ha el violà duas giadas la reglas da quarantina durant la pandemia. Ina giada è el turnà la fin da november da la Gronda Britannia en Svizra. Enstagl da restar durant 10 dis en quarantina, sco la regla era lura – ha el gia suenter 3 dis puspè bandunà la Svizra. Il segund malpass è capità durant il turnier da tennis da Wimbledon a Londra. António Horta-Osório ha visità quel enstagl da restar en la quarantina valaivla. Tar omadus cas n’ha la Credit Suisse mai prendì direct posiziun.

Speranza sin in nov vent

Il banchier portugais era vegnì elegì l’avrigl 2021 sco successur dad Urs Rohner – per puspè purtar ruaus en la banca gronda ch’è adina puspè stada en las lingias grassas. Differents scandals hai dà tar la Credit Suisse, tranter auter il scandal d’observaziun enturn l’anteriur CEO Tidjane Thiam, ma er pervi d’investiziuns dispitaivlas per exempel en il hedgefonds «Archegos» ed en ils fonds d’investiziun «Greensill».

Il cussegl d’administraziun da la Credit Suisse duai proponer Axel Lehmann tar la radunanza general ils 29 d’avrigl per l’elecziun sco president dal cussegl d’administraziun, scriva la banca en sia communicaziun. En consequenza desistia Lehmann da ses mandat en il cussegl d’administraziun da l’assicuranza Helvetia. A la proxima radunanza generala na stettia el betg a disposiziun per vegnir elegì. Quai ha communitgà l’assicuranza. Ad interim surpiglia Thomas Schmuckli quel post.

audio
Per tadlar curt e cumpact
ord RTR Audio dals 17.01.2022.
laschar ir. Durada: 1 minuta 11 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga