Studis actuals mussan che diversas mesiras e tests ginecologics n'èn betg necessarias. La glista ch'è vegnida elavurada d'ina cumissiun da qualitad da la Societad svizra per ginecologia sa restrenscha sin mesiras da la ginecologia. Mesiras da l'agid da pagliolanca vegnan eventualmain tractads pli tard.
Che ginecologs e ginecologas duessan desister da quellas mesiras ha diversas raschuns: Las bleras inflammaziuns da la vaschia sa medegeschian da sez. Ultra da quai sajan resistenzas d'antibiotica in grond problem. Perquai duessan dunnas simplamain baiver bler e prender medicaments sco Ibuprofen che retegna inflammaziuns tar inflammaziuns nuncumplitgadas . Allontanar mioms u cistas d'ovari saja savens cumbinà cun ristgs da cumplicaziun.
Sfrusch da cancer pli darar
Il punct che chaschuna las pli bleras discussiuns è il sfrusch da cancer dal culiez da la madra che duess mo pli avair lieu mintga trais onns, enstagl da mintg'onn. Thomas Eggimann, il secretari da la Societad svizra per ginecologia ed agid per pagliolanca, manegia che per dunnas che n'èn betg spezialmain periclitadas tanschia in interval da trais onns. La Lia cunter il cancer è da la medem'opiniun.
I na dat nagins indizis ch'in sfrusch annual avess avantatgs.
Cun reducir ils termins da «screening» possian ins tenor Stefanie de Borba era reducir stress e quitads nunnecessaris.
Cassas da malsauns ed organisaziun per pazientAs èn d'accord
L'associaziun svizra da las cassas da malsauns chatta medemamain ch'in interval da trais onns tanschia. Novs tractaments effizients possian mo vegnir introducids cun desister da mesiras nunnecessarias. Uschiglio collabeschia il sistem. Quai fetschia pia senn ord motivs da custs e temp.
Tenor l'organisaziun svizra da pazients e pazientas datti anc in auter effect positiv: Pazientas vegnian sensibilisadas per il fatg che betg tut las opziuns medicinalas èn adina las gistas. Medis e medias da l'autra vart stoppian era ponderar, tge mesiras che fetschian propi senn e dumandar pli savens lur pazientas.
Ins stoppia midar il pensar pertutgant ils tractaments medicinals ch'i dovra insumma. Thomas Eggimann da la Societad svizra per ginecologia declera che tschertas mesiras èn sa stabilisadas sur decennis e vegnan dumandadas da pazientas. La glista na duai però betg mo servir a medis e medias, mabain era a laics e laicas.
I va per in empowerment da pazientas: Ina dunna po uschia metter en dumonda mesiras.
Lia da cancer pretenda autra metoda da sfrusch
Cancer dal culiez da la madra saja in cancer, nua che prevenziun possia gidar bler tenor la Lia cunter il cancer. Tar il sfrusch da cancer sa tracti mintgamai d'in uschenumnà «Pap-Test» ch'intercurrescha midadas da cellas. La Lia cunter il cancer chatta però ch'ina autra furma d'intercurir faschess dapli senn per dunnas sur trent'onns – numnadamain quella da «HPV». Là vegnan ils virus da HP intercurids. Bunamain tut ils umans vegnan infectads cun tals virus durant lur vita, di Stefanie de Borba. Sche quellas na svaneschan betg, po quai esser in indizi per in emprim stadi da cancer. Pli giuvna ch'ina persuna è, e pli probabel ch'igl è ch'il virus svanescha puspè.
La varianta da testar da «HPV» vegn actualmain però anc betg pajada da la cassa da malsauns. Era il test che vegn fatg fin ussa – il «Pap-Test» – paja la segirada fundamentala mo mintga trais onns. Dunnas che vulan sa laschar intercurir pli savens, fan quai sin agen cust.