Siglir tar il cuntegn

Svizra Survegliader da pretschs è preoccupà pervi da las premias

Il survegliader da pretschs Stefan Meierhans crititgescha la politica e l'administraziun pervi da las premias da las cassas da malsauns che creschan ad in crescher.

Stefan Meierhans durant ina conferenza da medias.
Legenda: Stefan Meierhans crititgescha tranter auter ch’i na dat quest onn nagina examinaziun dals pretschs per ils medicaments. Keystone

Las premias sajan in spievel dals custs che sajan sa dublegiads dapi il 1996, ha ditg Meierhans envers la «SonntagsZeitung». Las decisiuns che chaschunian ils custs vegnian prendidas en ils chantuns e tar la confederaziun, surtut tar il ministeri da l'intern.

Ils responsabels na dumognian betg da furmar maioritads politicas per ina midada dal curs, uschia Maierhans. Sche quai restia uschia creschian las premias vinavant senza limita.

Las autoritads laschan «manar» da la farmazia.
Autur: Stefan Meierhanssurvegliader da pretschs

Faschessan las premias creschentas mal il venter a tuts sco a la classa media, vegniss la bloccada da refurmas forsa rutta. Meierhans crititgescha er ch’i na dat quest onn nagina examinaziun dals pretschs per ils medicaments. Ch’ina decisiun da la dretgira saja la culpa per quai, na lascha il survegliader dals pretschs betg valair.

L’uffizi federal per la sanadad haja simplamain betg gì in plan B per il cas che las firmas da farmazia giajan avant dretgira. El constateschia che las autoritads laschian «manar» da la farmazia, enstagl da prender enta pugn las mastrinas.