Stefan Walter daventa nov directur da la surveglianza federala dals martgads da finanzas, Finma. Il Cussegl federal haja approvà l'elecziun, ha communitgà la Finma. Walter, ch'ha 59 onns e vegn da la Germania, vegn a surpigliar l'uffizi sco directur da la Finma a partir dal prim d'avrigl. El è dapi il 2014 directur general tar la banca centrala europeica EZB. En questa funcziun ha el tranter auter installà la surveglianza da bancas per bancas relevantas per il sistem da la zona da l'euro. Avant è el stà secretari general tar la surveglianza da bancas da Basilea ed ha lavurà durant 13 onns per la Federal Reserve Bank of New York.
Stefan Walter daventa successur dad Urban Angehrn ch’aveva annunzià il settember sia demissiun. La directura ad interim, Birgit Rutishauser, resta en uffizi fin la fin da mars.
