Il Cussegl federal ha decis ulteriuras restricziuns per sbassar las infecziuns en l'entira Svizra. Las mesiras actualas valan enfin ils 28 da favrer. Ils puncts centrals en survista.
Far cumissiuns: Butias che na vendan betg products da niz quotidian ston serrar a partir dal glindesdi ils 18 da schaner. Butias che vendan products per il niz quotidian valan sco excepziun. Vinavant pussaivel èsi dad ir per rauba empustada avant lieu. Questas butias dastgan pia restar avertas: Kiosks, pasternarias, apotecas, optichers, butias per apparats d’udida, fatschentas per telecommunicaziun, fatschentas da reparatura e mantegniment, lavandarias, fatschentas da bajegiar ed orticultura e butias da fluras. Per quellas butias na vala la mesira existenta ch'ellas ston serrar suenter las 19:00 betg pli. Interpresas da servetschs sco coiffeurs, filialas da posta, bancas, biros da viadi, solariums e lavarias ston dentant serrar tranter las 19 e las 6 e las dumengias. Quai vala era sin las staziuns ed ils eroports.
Inscunters privats: Dapli restricziuns dat ì uss era per inscunters privats. Vul dir: ins dastga be s'inscuntrar cun maximal 5 persunas. Era uffants vegnan quintads. Il cussegl federal recumonda da limitar ils inscunters privats sin maximal dus tegnairchasas.
Homeoffice: Patruns da lavur èn obligads d'ordinar dapertut nua pussaivel homeoffice. Il patrun n'è dentant betg obligà da pajar als collavuraturs custs d'energia u custs da locaziun. Plinavant vala in obligatori da mascras en tuttas stanzas, nua che dapli ch'ins persuna è preschenta.
Territoris da skis: Per decider sch'ils territoris da skis dastgan avrir u betg èn ils chantuns responsabels: Els ston lubir il manaschi cun resguardar las cifras da corona, la situaziun en ils ospitals ed avunda capacitad tar il contact tracing e per far tests. Plinavant dovri concepts da protecziun rigurus.
La regenza grischuna ha decis da laschar avert ils territoris da skis, sche la situaziun na sa mida betg. En ils territoris da skis èn per il mument las terrassas avertas sche quai resta uschia vegn anc examinà dal uffizi federal per sanadad.
Ustarias, bars e discos: Ustarias, bars e discos restan vinavant serradas. Bleras ustarias porschan en quest temps alternativas sco per exempel take away.
Sport: Tut ils indrizs da sport ston serrar. Vinavant lubì è sport en il liber – dentant be en gruppas da maximalmain 5 persunas. Ad uffants sut 16 onns èsi permess activitads sportivas e culturalas – dentant senza concurrenzas. Sport professiunal è lubì – dentant senza public.
Temp liber: Museums, kinos, casinos, zoos ed ulteriurs indrizs da divertiment ston serrar. Medemamain serradas restan las salas da leger da las bibliotecas, emprestar cudeschs è però pussaivel. Activitads culturalas en in pitschen rom èn pussaivlas (enfin 5 persunas) cun tegnair distanza e purtar mascra. Occurrenzas cun public restan dentant scumandadas.
Excepziuns: Il Cussegl federal ha decidì ch'i duai valair en l'entira Svizra las medemas reglas da basa. Ils chantuns na duain betg pli avair la pussaivladad da schluccar las reglas, sche las cifras da corona èn bassas u tenor auters aspects epidemiologics. Quai vala davent dals 9 da schaner.
Dapli tests: Da nov èsi pussaivel da far tests svelts era senza sintoms, per exempel chasas da tgira ubain en firmas. Enfin uss eran be uschenumnads tests da PCR renconuschids. Da nov dastgan apotecas, ospitals, medis e centers da test far tut ils tests pussaivels – tests ch'èn renconuschids dal BAG.