- La scheffa da la Posta Susanne Ruoff ha declerà ch’ella sa retira da ses uffizi.
- Ruoff era vegnida sut squitsch en consequenza da l’affera d’auto da posta.
- Ella surpiglia l’entira responsabladad per las irregularitads, ha communitgà ina agentura responsabla.
- L’entschatta favrer era vegni enconuschent che l’AutoDaPosta SA aveva onns a la lunga fatg gudogns sin lingias subvenziunadas da la Confederaziun ni dals chantuns. Ils chantuns pretendan perquai indemnisaziuns da 78,3 milliuns da la posta.
La scheffa da la Posta Susanna Ruoff haja suenter ch’ella ha giu invista en ils documents da retschertga constatà che quai ha dà indizis per las irregularitads da cudeschaziun tranter ils onns 2007 e 2015 da l’AutoDaPosta SA, quai scriva l’agentura da communicaziun responsabla.
I na dettia betg indizis concrets che Ruoff haja giu enconuschientscha da las praticas. Ella accentuescha ch’ella na savevi nagut.
La Posta vegn ad infurmar glindesdi
Gia dapi venderdi passà è enconuschent ch’il president da la Posta Urs Schwaller e la cussegliera federala Doris Leuthard vegnian ad infurmar sur da l’affera tar l’AutodaPosta SA: Per la president da la cumissiun per traffic e communicaziun dal Cussegl naziunal Edith Graf-Litscher (PS/TG) na saja era cun la retratga da Ruoff l’affera anc betg serrada giu. Impurtant sajan ils rapports da la Posta e dal Uffizi federal da polizia, ha ditg Graf.
L’entschatta favrer era vegni enconuschent che l’AutodaPosta SA haja onns a la lunga survegnì subvenziuns per lingias che faschevan gudogn. Uss pretendan ils chantuns 78,3 milliuns francs enavos.
RR novitads 20:00
