La direcziun da la PLD Son Gagl propona la giurista da 51 onns a la nominaziun. Quai ha la direcziun decis unanimamain la mesemna saira, hai num en la communicaziun.
Ils delegads da la PLD duain decider ils 20 da december da la proposta. Cun questa candidatura vul la PLD defender ses sez en il Cussegl dals chantuns.
Scolaziun ed economia en il focus
L'anteriura presidenta da la partida è dapi quest onn en il parlament chantunal dal Son Gagl. Suenter Erika Forster-Vannini e Karin Keller-Sutter fiss ella la terza dunna dal Son Gagl en il Cussegl dals chantuns. La giurista e mamma da dus uffants haja ina vasta experientscha politica. Ses focus saja sin temas da la scolaziun ed economia sco era sin dumondas da la societad.
Elecziun da cumbat
Dal sez da Karin Keller-Sutter vegn decidì ils 10 da mars. Gia annunzià da candidar ha il cusseglier guvernativ dal Son Gagl e directur da finanzas Benedikt Würth (PCD). La PCD Son Gagl ha da decider la sonda a la radunanza da delegads da sia nominaziun.
Spetgada vegn er ina candidatura da la PPS. Quella n'ha enfin uss gì nagin success tar las elecziuns per il Cussegl dals chantuns a Son Gagl. Qua pudessan esser Stefan Kölliker u Esther Friedli candidats pussaivels.
Er betg d'excluder saja ina candidatura dals Verds. La PS, che haja cun Paul Rechsteiner gia in dals dus sezs, na vegn probablamain betg a candidat. El vul empruvar da tegnair ses sez tar las elecziuns dal 2019.
RR novitads 07:00