Siglir tar il cuntegn

Svizra Sustegn er per ovras idraulicas las pli pitschnas

Era las ovras idraulicas las pli pitschnas duajan vegnir sustegnidas da la confederaziun, quai ha decis il Cussegl dals chantuns en vista en il rom da la debatta davart la strategia d’energia. Il mument na datti betg ina limita per survegnir daners da la confederaziun.

ovra idraulica, bischen da pressiun nair che va en ina paraid
Legenda: L'ovra idraulica pitschna da Murkart, datiers da Frauenfeld, chantun Turgovia. Keystone

Il Cussegl federal aveva proponì da promover ovras cun ina prestaziun da dapli 300 uras kilowatt, il Cussegl naziunal vuleva auzar la limita sin 1 megawatt. La chombra pitschna è uss turnada a la proposta dal Cussegl federal. Las ovras idraulicas pitschnas fruntan sin resistenza tar las organisaziuns d’ambient sco era tar las associaziuns da pestgaders.

Implants d'energia era en territoris natirals protegids

Vitiers ha il Cussegl dals chantuns decidì che turbinas da vents, ovras idraulicas u ovras d'accumulaziun a pumpa pon sut circumstanzas era vegnir construidas en in territori natiral protegì. Nizzegiar las energias regenerablas duai vegnir declerà ad in interess naziunal. Uschia fiss pussaivla ina consideraziun dals interess cura ch'i va per construir in implant en cuntradas da muntada naziunala.

En quest punct suonda la chombra pitschna da principi a la regenza svizra ed al Cussegl naziunal. El ha dentant restrenschì levet la consideraziun dals interess. Ina construcziun d'implants en in territori natiral protegì duai esser pussaivla sulet sche quest territori na vegn betg violà en sia valuta centrala.

RR novitads 11:00