Migrantas e migrants duain vinavant pudair transferir daners en lur patria. Ensemen cun la Gronda Britannia ha la Svizra lantschà in appel mundial per che tals chanals da retransferiments restan avert er durant la crisa da corona. Quai ha communitgà il Departament federal d'affars exteriurs.
Pajaments existenzials
Bleras famiglias en pajais povers na possian senza quests daners betg cumprar victualias u pajar la scola a lur uffants. Pervi da las mesiras da corona hajan stuì serrar blers manaschis ch'organiseschan tals transfers da finanzas. La banca mundiala quinta cun radund 20% damain pajaments.