Siglir tar il cuntegn

Header

video
«Firmas pon spetgar cun deponer la bilantscha»
Or da News-Clip dals 09.04.2020.
laschar ir
cuntegn

Sustegn per l'economia Cussegl federal vul mesiras per impedir unda da concurs

Il Cussegl federal vul prender mesiras per proteger firmas da concurs chaschunads da la crisa da corona. Perquai ha el incumbensà l'Uffizi federal da giustia e polizia d'elavurar e preschentar propostas l'autra emna, uschia ha declerà cussegliera federala Karin Keller-Sutter avant las medias.

Ultra da quai ha il Cussegl federal decidì da betg prolungar il stop da scussiun e las vacanzas da dretgira ch'el aveva introducì cun la crisa da corona. Uschia scada quai termin sco planisà ils 19 d'avrigl a mesanotg. Sistir ils termins en connex cun scussiuns na saja a lunga vista betg l'instrument adattà per schliar ils problems economics actuals. In stop da scussiuns reduceschia la morala da pajar da las interpresas, uschia ha declerà la ministra da giustia Karin Keller-Sutter.

Enstagl duai dar mesiras che impedeschan concurs che smanatschan pervia dal coronavirus. La Confederaziun è da l'avis ch'ina unda da concurs haja grevas consequenzas per l'economia e per il martgà da lavur svizzer.

Spustar concurs chaschunai da la crisa da corona

Concret examineschia l'Uffizi federal da giustia sin incumbensa dal Cussegl federal ina regulaziun per spustar concurs che smanatschan pervia da la crisa da corona. Uschia possian firmas che vegnan en stretgas finanzialas pervia da la situaziun economia en connex cun il coronavirus spustar il concurs. Cundiziun è dentant che las finanzas da la firma eran avant saunas e ch'i dat suenter la crisa speranza da salvament Sper quai duai dar ina la pussaivladad per fatschentas pitschnas e mesaunas da spustar pajaments. Quai sch'els èn en stretgas finanzialas pervia da la crisa da corona. Uschia duain las fatschentas avair temp da reorganisar e sanar il manaschi.

Dretgiras duain duvrar novas tecnologias

Per distgargiar las dretgiras duai dar ina regulaziun speziala che lubescha da far proceduras civilas via conferenza da video e telefon. Tar proceduras administrativas è quai gia uss il cas. Uschia possian ins mantegnair il manaschi giudizial.

video
«Las dretgiras han chattà soluziuns co proceder vinavant»
Or da News-Clip dals 09.04.2020.
laschar ir

RTR novitads 08:30

Artitgels legids il pli savens

Ir a sanester Ir a dretg