Il Cussegl federal ha oz decidì in schlargiament da l'agid a l'economia en il sectur da la lavur curta:
- Il dretg sin indemnisaziuns per lavur curta han er emprendists e persunas cun contracts da lavur temporars – quai a partir dal schaner fin la fin da zercladur dal 2021. Tar ils emprendists vala dentant la premissa, che quels pon cuntinuar cun l'emprendissadi.
- Il termin da carenza (temp da spetga) vegn schlià retrospectiv sin il cumenzament da settember 2020 e fin la fin da mars 2021. Dapi il settember valeva in temp da spetga dad in di per mais.
- La durada maximala per pudair retrair indemnisaziuns per lavur curta vegn schliada temporarmain. Er quella regla vala retrospectiv dal 1. da mars 2020 enfin ils 31 da mars 2021.
audio
Il Cussegl federal schlargia il sustegn per lavur curta
ord Actualitad dals 20.01.2021.
laschar ir. Durada: 5 minutas 1 Secunda.
Cun questas mesiras duain ulteriuras barrieras per survegnir indemnisaziuns da lavur curta vegnir abolidas. Ultra da quai duai la liquiditad dad interpresas vegnir meglierada e las firmas duain uschia survegnir sustegn per betg stuair stritgar plazzas da lavur, argumentescha il Cussegl federal.
Sco Parmelin ha declerà en la conferenza da pressa, pondereschia il Cussegl federal dentant er da reactivar ils credits da covid. Il mument vegnia in tal pass sclerì.
Qua pudais guardar l'entira conferenza da pressa:
