La Suva ha registrà l'onn passà uschè blers accidents dal temp liber sco anc mai. Quai cun bun 290'000. In plus da 14% cumpareglià cun l'onn avant. La raschun saja surtut la bell'aura da la primavaira e la stad. Blers pertutgads èn sa blessads tar activitads d’outdoor.
L’onn 2022 haja gì ordvart bunas cundiziuns per ir cun skis, cun velo da muntogna u da viandar. Gia il mars saja stà extraordinari, ha il statisticher da la Suva, Alois Fässler, sa laschà citar. L’aura sulegliva e chauda haja gì per consequenza ch’ils umans hajan passentà bler temp ordadora. En gnanc in auter mais da l’onn ha la Suva registrà dapli accidents da sport e da viandar.
