Raffaele Da Rosa fa 42'072 vuschs. Il directur dal socialesser e da sanadad Paolo Beltraminelli percunter, ch'era dapi il 2011 en uffizi, cuntanscha sulettamain 31'744 vuschs.
Confermà en la regenza cun las bleras vuschs, ha il suveran tessinais ils dus represchentants da la Lega Norman Gobbi (67'125 vuschs) e Claudio Zali (62'892 vuschs). Era vinavant en la regenza è il liberal Christian Vitta che ha fatg 62'483 vuschs. Medemamain reelegì, dentant cun bler pli paucas vuschs, è il socialdemocrat Manuele Bertoli (38'674 vuschs).
Dunnas na tutgan uschia dapi il 2015 ed er uss en il futur betg tar la regenza tessinaisa. Ed ina unda verda n'hai era betg dà tar l'elecziun da la regenza. La participaziun a l'elecziun è stada cun bun 59 pertschient – cleramain pli bassa ch'ils radund 62 pertschient da l'onn 2015.
Lega ensemen cun la PPS ils ferms
La glista cuminaivla da la Lega e la partida populara ha cuntanschì la pli auta cumpart da las vuschs cun 28,1%. Quai è damain ch'ils 32,17%, che las duas partidas avevan fatg separadamain avant quatter onns.
La segund auta cumpart dals votants ha cuntanschì la PLD, cun 24,5% da las vuschs. Lura suondan la PCD cun 18,33% e la PS cun 16,79%. Ils socialdemocrats eran s'alliads cun ils giuvens socialists.
Las vuschs per il Cussegl grond tessinais vegnan dumbrads ora pir il glindesdi.
RR novitads 20:00
