Agricultura persistenta, scumond da tecnologia da gens e dazis pli auts per imports da products da l'exteriur. L’idea da l’iniziativa per ina suveranitad alimentara vegn da principi sustegnida d'ina maioritad en il Cussegl naziunal. Ma l’iniziativa va a la gronda part memia lunsch, uschia il resun or da la prima part da la debatta.
Visiuns betg acceptablas
Era memia lunsch giaja la visiun dal Cussegl federal per l’agricultura als represchentants dals purs en il Cussegl naziunal. In punct che è vegnì menziunà pliras giadas en la debatta davart l’inizitiva. La critica la pli directa ha il Cussegl federal survegnì dal president dals purs svizzers e cusseglier naziunal da la PCD, Markus Ritter. La visiun dal Cussegl federal saja in affrunt encunter ils purs.
Ni l'inizitiva ni la visiun dal Cussegl federal na para a mai la via correcta.
Però era il cusseglier naziunal da la PBD, Duri Campell, ha fatg cler ch'el na sustegnia betg la visiun dal Cussegl federal.
Per la politica agrara a partir dal 2022 PA22+ propona il Cussegl federal ina strategia da duas cumponentas: Manaschis svizzers duajan survegnir dapli perspectivas, e fieras agraras naziunalas ed internaziunalas duajan vegnir colliadas meglier en il rom da cunvegnas da commerzi. Quai è il punct che disturba ils purs il pli fitg.
Dentant na possia quai betg esser ch’ins dettia la culpa als dazis per tut ils problems, ha ditg Beat Jans da la PS. El ha fatg ina cuntraproposta a l’iniziativa per la suveranitad alimentara che duai preparar ils purs sch'ils cunfins vegnissan averts pli fitg. La cuntraproposta pudess chattar sustegn da la sanestra.
Suveranitad alimentara anc betg decis
Il Cussegl naziunal mussa simpatia, però nagin sustegn per l’iniziativa per la suveranitad alimentara. Bunamain tut las fracziuns han plidà encunter l’iniziativa. Decis n'ha la chombra gronda anc nagut. La debatta cuntinuescha la gievgia.
Il Cussegl federal, sco era la cumissiun dal Cussegl naziunal proponan da dir na a l’iniziativa sco era a la cunterproposta. Uschia ch'il responsabel per la politica agrara, Cusseglier federal Johann Schneider Ammann, po prender posiziun là encunter las reproschas.
L’inizitiva è vegnida lantschada dal sindicat dals purs Uniterre e vegn sustegnida da sur 70 organisaziuns.
RR actualitad 12:00