Burkhalter ha infurmà davart il progress en la realisaziun da l'artitgel d’immigraziun, quai conferma il departament da l'exteriur. Omaduas partidas han accentuà las intensivas relaziuns tranter la Svizra e la Svezia, il 2015 muntava il volumen da commerzi a dapli che 3 milliardas francs.
Plinavant era la perscrutaziun tema. Instituts dad omadus pajais lavuran ensemen en il rom dal program da perscrutaziun da l'UE (Horizon 2020). Là èn surtut ils projects davart novas tecnologias (FET Flagships), il «Human Brain Project» ed il project «Graphene» d'impurtanza.
Era la buna collavuraziun en las organisaziuns internaziunalas ha Burkhalter accentuà. Ils dus pajais mettian las medemas finamiras tar l'ONU. Tranter auter èn quai il svilup durabel, l'agid umanitar, la promoziun da la pasch ed il discharmament, ch'ils dretgs internaziunals vegnian resguardads e da rinforzar ils dretgs umans.
RR novitads 15:00