Ils emprims dus quartals da l'onn sajan stads relativamain ferms. En il terz quartal sajan las reservas da lavur dentant idas in zic enavos. Tuttina saja la svieuta dals emprims nov mais dal 2017 pli auta che durant la medema perioda da l'onn passà. La svieuta munta a 15,4 milliardas francs ed è cunquai 4% pli auta che l'onn 2016.
Ristgs tar construcziun d'abitaziuns crescha
Dapi insaquants onns vegnian dapli abitaziuns bajegiadas che duvradas. Adina dapli da las 50'000 abitaziuns ch'èn vegnidas bajegiadas restian uschia vitas. Quai pervia che l'augment da la populaziun saja marcantamain pli bass ch'anc avant intgins onns, scriva l'Uniun svizra dals impressaris constructurs en lur statistica da quartal.
Il dumber da permissiuns da construcziun mussian ch'il martgà reageschia sin quest svilup: I vegnia bajegià pli paucas abitaziuns, dentant sajan quellas pli pitschnas e pli bunmartgadas. L'Uniun svizra dals impressaris constructurs parta dal fatg che las svieutas tar la construcziun d'abitaziun sa reduceschian gia l'onn proxim.
RR novitads 09:00