En Grischun hai dà l'onn passà 1'583 naschientschas, percunter 1'744 mortoris. Be questas cifras avessan atgnamain manà ad ina diminuiziun da la populaziun en il chantun per 161 persunas. En tut è la populaziun però creschida fin la fin dal 2019 per 609 persunas u 0,3% sin total sin 198'988 persunas, pia stgars 200'000. L'augment vegn surtut da quai che pli bleras persunas dad auters chantuns han fatg midada en Grischun che quai che persunas èn idas davent dal chantun. Quai mussan las cifras provisoricas da l'Uffizi da statistica per il 2019.
Dapli persunas sur 65 che uffants e giuvenils
En il chantun Grischun è la cumpart da las persunas pli veglias pli gronda che quella dals uffants e giuvenils. Uschia dumbrava il chantun la fin dal 2019, passa 35'000 uffants e giuvenils u stgars 18% da la populaziun. Per cumparegliar: Persunas sur 65 onns devi lura passa 43'000, quai che correspunda a 22% da l'entira populaziun. Cun stgars 72'000 furman las persunas tranter 40 e 64 onns la pli gronda cumpart da la populaziun chantunala, numnadamain 36%.
Dapli umens che dunnas
En Grischun vivevan la fin da l'onn passà stgars 99'700 umens e radund 99'300 dunnas, pia var 400 umens dapli che dunnas. Stgars 162'000 eran Svizzers e passa 37'000 persunas dad ulteriurs pajais. Fertant che las dunnas fan ora cun passa 82'000 la maioritad da la populaziun svizra en Grischun, furman ils umens cun stgars 20'500 la maioritad tar la populaziun cun derivanza d'in auter pajais.
Populaziun en Svizra crescha vinavant
L’onn passà saja la populaziun creschida per 0,7% sin 8,6 milliuns persunas. Quai scriva l’Uffizi federal da statistica. Var in quart da la populaziun en Svizra èn burgais esters. Sper la populaziun en general è era la cumpart da las persunas pli veglias creschida. Quai per 1,8 %, sco l’Uffizi federal da statistica scriva vinavant. Persunas sur 65 onns fan cun quai ora bunamain 20% da la populaziun.
