Entras ina fusiun dovri damain persunal d’administraziun. «Quai quietescha la situaziun da la mancanza da persunas dal fatg che dominescha er en las administraziuns communalas, plinavant poi esser finanzialmain d’avantatg», ha ditg Christoph Niederberger, il directur da l'associaziun SGV, sin dumonda da l’agentura da novitads Keystone-SDA.
Entras fusiuns vegnia l'administraziun communala era pli professiunala, hai gì num vinavant. Gist vischnancas pitschnas profiteschian da prestaziuns da servetsch novas u da servetschs extendids tras la nova administraziun. Bleras vischnancas collavurian gia oz tar ils pumpiers, tar il provediment d’aua u tar l'allontanament da rument.
65% da las vischnancas èn en la Svizra tudestga
Sco quai che la SGV scriva en ses newsletter sajan 1'391 da las vischnancas dumbradas l’onn 2024 en la Svizra tudestga. Quai correspundia ad ina quota da 65,3%. 619 (29%) vischnancas u citads sajan da lingua franzosa e 121 (5,7%) da lingua taliana.
Las pli bleras vischnancas datti tenor la dumbraziun en il chantun Berna cun 335 vischnancas. Suenter suonda il chantun Vad cun 300 vischnancas. Las pli paucas vischnancas datti en ils chantuns Glaruna (3 vischnancas), Basilea-Citad (3) ed Appenzell Dadens (5).
Tschintg fusiuns
Per il prim da schaner 2024 han tschintg vischnancas fusiunà en Svizra. En il chantun Argovia èn Turgi e Baden daventads la vischnanca da Baden AG. En il chantun Berna han Reutigen e Zwieselberg fusiunà a la vischnanca da Reutigen BE sco era Wangen an der Aare e Wangenried a la vischnanca da Wangen an der Aare BE.
En il chantun Soloturn èn Buchegg e Lüterswil-Gächliwil s'unids a la vischnanca Buchegg SO. La suletta fusiun da vischnancas en la Svizra latina ha gì lieu tranter Beurnevésin e Bonfol. Ils vitgs van ussa sut il num Basse-Vendline JU.