«Nus pruvain da far puncts cun qualitad ed infurmaziuns divertentas»
Thomas Bucheli è dapi il 1995 manader dad SRF Meteo e dapi l'entschatta il 1992 da la partida. Il moderatur ha pia vesì il svilup che l'emissiun ha fatg sur tut ils onns. Il pli grond midament haja segir il svilup immens da la tecnica purtà. Quai haja fatg tut pli spert, ma era ils consuments sajan pli pretensius. Il success da l'emissiun (in milliun aspectaturs) vesa Buchli en la cumbinaziun dad infurmaziuns qualitativas da l'aura sco era elements divertents davart la metrologia. Ina emissiun speziala pil 25avel giubileum na dettia dentant betg. L'aspectatur haja segir gust dal giubileum, tuttina veglia el sco mintgadi savair en l'emprima lingia l'aura.
Meteo - gnanc uschia simpel
Sco moderatur da SRF Meteo ston ins esser resistent a l’aura. I vegn numnadamain moderà dal tetg dal studio a Turitg, da tut aura, adina live. Uschia pon ins dar en venter sur pleds, cumbatter il suffel cun ina umbrella ni empruvar d’esser pli dad aut ch’in fieu artifizial.
Manchentà l’atgna emissiun
I va dentant anc pir. Sandra Boner n’èra betg conscienta ch’ella era sin emissiun, ed ella ha fatg ina mesa moderaziun, e lura detg bla bla bla.
Christoph Siegrist ha ina giada perfin manchentà si'atgna emissiun, perquai che la Tagesschau era stada pli curta ed el sa fatschentava anc cun datas da naiv. Siegrist ha lura sa stgisà via Twitter e ses schef Thomas Bucheli ha manegià, ch’i saja stà chasti avunda ch’in milliun persunas haja vesì ses faux pas.
RR actualitad 06:20