Sco quai ch'il servetsch d'infurmaziun agricul LID communitgescha saja quai in nov record minus. Dapi la fin dals onns 80 hai anc mai dà uschè paucas vatgas da latg, quai conferma er l'uniun dals producents da latg svizzers. Ils motivs na sajan betg clers. Pussaivel saja ch'intgins producents da latg mazzan pli baud ils animals perquai ch'il pretsch da latg è bass.
Il latg na daventa dentant betg stgars
Era ch'il dumber dals bains purils sa sminuescha possia purtar sco consequenza ch'i dat pli paucas vatgas da latg. Sco quai ch'il LID ha communitgà saja il dumber dals bains purils sa sminuì da 79'479, l'onn 1996 per 33% sin 53'232 l'onn 2015. Dentant sajan ils bains creschids da 15,2 hectaras l'onn 2000 sin 18,3 hectaras l'onn 2011.
Che la Svizra n'haja betg avunda latg pli na saja dentant betg da temer. Ils bains pli gronds produceschian dapli latg damai che quels lavurian fitg professiunal. Era la genetica dals animals saja vegnida megliera, uschia ch'i dettia anc adina avunda latg schegie ch'i haja pli paucas vatgas da latg.
RR novitads 11:00