Fin uss vala ferma surpaisa en la strategia naziunala da sanadad da la Svizra sco factur da ristga, betg sco ina malsogna. Tenor l'Allianza Adipositas Svizra duai quai sa midar. L'uniun che vul promover therapias e prevenziun cunter surpaisa ha annunzià quai oz.
En futur duai surpaisa valair sco «malsogna betg transmissibla» en la strategia da la Svizra. Tras quai dessi dapli daners per prevenziun e terapia. E la politica duai er proteger persunas cun surpaisa pli fetg da stigmatisaziun.
Tenor l'allianza hai dà 2017 gia dubel uschè bleras persunas cun ferma surpaisa sco 1992. 10% da las dunnas, e 12% dals umens sajan pertutgads.