Svizra - Avertiment a la politica: Betg tutgar ils locataris
L'Uniun dals locataris svizzers avertescha la politica da betg indeblir la protecziun dals locataris vertenta u schizunt abolir quella. L'uniun vegnia a prender il referendum cunter talas decisiuns dal parlament. Quai ha ditg l'uniun a sia radunanza generala a Bienna.
Ils tschains da locaziun sajan sin in livel maximal, hai num en ina resoluziun che l'uniun ha deliberà da sia radunanza generala da la sonda a Bienna. Ils pretschs sajan creschids dapi l'onn 2000 per passa 50%, en tschertas regiuns schizunt anc pli fitg.
Socialmain saja nun-responsabel ed economicamain fatal dad indeblir la protecziun dals locataris u schizunt d'abolir quella sco tscherts parlamentaris pretendian.