Siglir tar il cuntegn
Er en la Svizra vesan ins la midada dal clima: il meglier vi dals glatschers che van adina pli fitg enavos.
Legenda: Er en la Svizra vesan ins la midada dal clima: il meglier vi dals glatschers che van adina pli fitg enavos. Keystone

Svizra Center naziunal per integrar la savida dal clima tar decisiuns

La Svizra survegn in center naziunal per simplifitgar l'access ad infurmaziuns scientificas davart il clima. Quest center duai gidar uffizis, la politica, l'economia e la societad da vesair tant ils ristgs sco era las schanzas ch'èn liadas al clima, sco l'Uffizi federal d'ambient scriva.

Dapli davart il tema

La midada dal clima è tant per il directur d’in ospital sco per il viticultur ina gronda sfida. Tgi che sto decider sche chombras da pazients dovran ina stanza climatisada u tge sort dad ivas che vegna il meglier a frida cun la setgira, ha cun il nov National Center for Climate Services (NCCS) in nov post da consultaziun. Grazia al nov center naziunal duain ils ristgs vegnir reducids, las schanzas nizzegiadas ed ils custs optimads.

Las correctas decisiuns per l’avegnir

Il nov post è vegnì preschentà oz glindesdi a Berna. Sia incumbensa saja da chanalisar e far accessibel en furma chapibla las differentas infurmaziuns ch’èn avant maun tar ils differents uffizis federals e tar las differentas instituziuns. Quellas infurmaziuns duain lura gidar tant ils privats sco las autoritads da prender las correctas decisiuns per l’avegnir en vista a la midada dal clima.

Infurmaziuns dal passà, dad oz e dal futur

Quai possia per exempel esser in proprietari d’ina chasa che veglia savair sch’il tetg da sia chasa è adattà per collecturs da sulegl, u il responsabel da l’uffizi da construcziun bassa d’ina vischnanca ch’è adina pli fitg confruntà cun auas grondas, ubain era il pur ch’ha da cumbatter in nov parasit. A tut quels furneschia il NCCS infurmaziuns scientificas dal passà, dad oz e dal futur davart il clima e sias consequenzas.

RR novitads 11:00

Artitgels legids il pli savens