Svizra - Confederaziun metta online sias pli impurtantas ovras d'art
La Confederaziun posseda radund 21'000 ovras d'art. Questa collecziun duai uss vegnir fatga accessibla a la publicitad. Perquai metta l'Uffizi federal per cultura en futur online las ovras las pli impurtantas e las infurmaziuns tar quellas, scriva l'agentura da novitads SDA.
En in emprim pass sajan da vesair 93 ovras or da la collecziun da la Fundaziun Gottfried Keller. En il decurs dal proxim onn duai la purschida online dentant vegnir cumplettada pli e pli fitg.
La collecziun da la Confederaziun cumpiglia ovras da tuttas epocas, dal temp medieval fin a l'art contemporan. Tar quella tutgan purtrets, sculpturas, fotografias, ma er artisanat e tapissarias. La collecziun saja creschida ferm durant ils onns, grazia a donaziuns e legats.
