Legenda:
L'evaluaziun da las cooperaziuns è vegnida fatga, suenter che pliras cunvegnas eran vegnidas crititgadas - sco per exempel la cooperaziun cun la Svezia per cumprar il «Gripen».
Keystone
Las cooperaziuns d'armament da la Svizra cun auters pajais èn nuntransparentas. Quai crititgescha la cumissiun da gestiun dal Cussegl dals chantuns e pretenda transparenza.
Scha quai na dettia betg dapli transparenza, lura ristgia la Svizra da far cooperaziuns nuschaivlas. La critica da la cumissiun da gestiun dal Cussegl dals chantuns sa drizza primarmain cunter l'Uffizi federal per armament «Armasuisse». En in rapport pretenda la cumissiun da gestiun ch'il Cussegl federal prendia mesiras per eliminar las mancanzas. La «Armasuisse» duai fixar in post che ha la survista da las activitads.
