Svizra - Cussegl federal vul sustegnair minoritads periclitadas
Il Cussegl federal vul sa participar finanzialmain vi da las mesiras da protecziun per minoritads periclitadas. El ha perquai incumbensà il departament da giustia d'elavurar in'ordinaziun correspundenta.
Tar las minoritads periclitadas tutgan surtut las cuminanzas da gidieus, però er cuminanzas muslimas che pudessan vegnir en il visier da terrorists u d'autras persunas violentas, hai num en ina communicaziun.
En in emprim pass vul il Cussegl federal impunder fin 500'000 francs l'onn. Cun quests daners duain tranter auter vegnir finanziadas campagnas d'infurmaziun u scolà persunal d'instituziuns periclitadas.