Svizra - Damain daivets – pli pitschen privel da scufla immobigliara
Al martgà d’immobiglias svizzer datti er vinavant in grond privel d’ina scufla. Quest privel è dentant ì enavos in zic l’entschatta da l’onn. Las raschuns: Ils pretschs d’atgnas chasas stagneschan. A medem temp èn ils debits vegnids pli pitschens.
Sco quai che la banca UBS communitgescha, èn ils credits ipotecars da las chasadas sa reducids per bunamain 3% sin il pli bass nivel dapi 15 onns. Perquai ch’il svilup da las entradas è vinavant debel è il martgà d’immobiglias restà pli u main equilibrà.
Privel da scufla resta
En l’emprim quartal è l’index per scuflas immobigliaras da l’UBS sa sbassà da 1,41 puncts sin nov 1,38 puncts. Uschia resta l’index vinavant en il spazi ristgant – quai ch’è il segund aut nivel da privel da l’index. A partir d’ina valur da 2 discurriss l’UBS d’ina scufla immobigliara.