En il sectur d'industria han il december 33% da las emploiadas e dals emploiads lavurà davent da chasa. Quai èn dubel uschè blers sco la stad e l'atun. En il sectur da servetsch munta la cumpart da persunas ch'ha fatg lavurà a chasa il december a 43%. Quella cumpart è tranter il maximum da la primavaira (53%) ed il minimum durant la stad (43%).
Different trend tar lavur curta
Quai che pertutga il trend da lavur curta datti ina gronda differenza tranter ils dus secturs. En l'industria datti damain lavur curta. Las interpresas dumandadas han inditgà che radund 9% da lur emploiadas ed emploiads fan lavur curta. L'atun (14%) e la primavaira (28%) era la cumpart da persunas che fan lavur curta en il sectur d'industria marcantamain pli grond.
En il sectur da servetsch è la quota da lavur curta percunter puspè creschida dapi l'atun e quai per 2% sin 8%. La primavaira muntava la quota a 32%.
Manaschis optimistics, malgrà segunda unda
L'industria svizra è puspè pli optimistica e quai malgrà la segunda unda da corona. Tenor l'index da cumpra la Credit Suisse è l'optimissem tar ils manaschis il mument schizunt sin il pli aut stan dapi il settember 2018.
L'index che mussa la tenuta dals manaschis envers l'avegnir è creschì per prest 3 puncts sin 58 puncts. Valurs sur 50 inditgeschan ina clera creschientscha. Durant il punct culminant da la pandemia la primavaria era l'indext anc crudà ensemen sin radund 40 puncts.
