La Confederaziun aveva bloccà ils daners iranais tranter ils onns 2007 e 2012, suenter che las Naziuns Unidas avevan relaschà sancziuns cunter l'Iran. Cun las sancziuns vuleva la communitad da stadis sfurzar l’Iran da desister da la construcziun d’ina bumba atomara.
Suenter la cunvegna da mez schaner han ils blers pajais abolì las sancziuns cunter l’Iran.
Martgà puspè avert per firmas svizras
Cun la fin da las bleras sancziuns po l’Iran tenor atgnas indicaziuns uss puspè far diever d’ina summa monetara da sur 32 milliardas dollars. Quests daners eran bloccads internaziunalmain tar diversas bancas.
Er firmas svizras pon uss profitar da la situaziun: la cunvegna avra per bleras interpresas in nov martgà ed uschia chaschuns da far fatschenta cun l'Iran.
Iran vul stimular l'atgna economia
Suenter che las sancziuns cunter l'Iran èn abolidas, vul il pajais modernisar si’economia: il minister da traffic Abbas Achundi ha annunzià da vulair cumprar passa 120 aviuns dad Airbus. Els sperian da pudair suttascriver ils contracs l'emna proxima.
Plinavant vul l'Iran augmentar il commerzi cun la China per almain 10 giadas sin 600 milliardas dollars durant ils proxims 10 onns. Quai han communitgà il president chinais Xi Jinping e ses collega d'uffizi iranais Hassan Ruhani. L'Iran dovria investiziuns estras da tranter 30 e 50 milliardas dollars ad onn per che l'economia creschia sco planisà per 8%.
RR novitads 16:00
