Il circus Knie po cuntinuar sia turnea malgrà ils donns da stemprà vid sia tenda. Fin la proxima preschentaziun mardi saira dettia ina tenda da reserva, uschia vegn communitgà. Dumengia saira ha in ferm vent sdermanà a plaun la tenda durant las lavurs da demontascha. Cun laschar giu la tenda saja questa sa scuflada sco in ballun e lura cupitgada, scriva la Gebrüder Knie Schweizer Nationalcircus SA. La turnea dal circus va a fin la dumengia proxima a Lugano.
Tenor la polizia hai era dà donns en ils chantuns Berna, Basilea-Champagna e Genevra. Plantas cupitgadas han gì per consequenza vias serradas. Plinavant è il current electric crudà ora la dumengia suentermezdi per radund in'ura en ils vitgs da Bad Ragaz, Pfäfers e Vättis.
143 kilometers per ura
Il pli ferm han ils vents buffà sin il Pilatus cun 143 kilometers per ura. 131 kilometers per ura hai dà a La Dôle en il Giura vadais e 129 kilometers per ura sin il Chasseral en il Giura bernais.
Impediments da traffic
L'aura burascusa ha er disturbà il traffic. Lingias da tren n'han per part betg savì circular tenor urari. Era la nav-fera sin il Lai da Constanza n'ha betg savì cursar. Plinavant hai dà impediments sin la plazza aviatica da Genevra. La dumengia suentermezdi han ils sgols gì retards u stuì vegnir annullads. Era a tscherts aviuns sin la plazza aviatica a Turitg han ils ferms vents fatg in stritg tras il quint.
RR novitads 06:00