La Germania ha mess da la vart il contract. Enfin las elecziuns dal Bundestag il 2017 na vegnia quai betg a sa midar, ha Widrig ditg a la gasetta «TagesAnzeiger».
Il 2013 aveva la Svizra ratifitgà il contract cun la Germania. Quel dueva vegnir realisà enfin il 2020. Il contract aveva previs in scumond da sgular la notg sur il territori da la Germania per atterrar sin la plazza aviatica a Kloten.
Dilemma per la plazza aviatica
Per realisar il contract stoppia la plazza aviatica l'emprim anc prolungar 2 pistas. Questa decisiun haja la populaziun però anc da pigliar a l'urna, uschia Widrig. Da bajegiar la prolungaziun senza esser segir che la cunvegna vegnia lura era realisada na saja però era betg raschunaivel.
Dapli ruaus per la populaziun da la Germania dal sid
Il contract statal preveda ch'ils temps da scumonda da sgular sur la Germania dal sid vegnia spustà da las 21:00 sin las 18:00. Persuenter dastgassan ils aviuns la bunura sgular ina mes'ura pli baud sur la Germania - pia a partir da las 06:30.
Il dumber dals sgols sur la Germania dal sid na fiss betg limità.
RR novitads 10:00