Il Cussegl federal ha definì ils 14 matg 2025 las valurs directivas per la nova cunvegna d’electricitad cun l’Uniun europeica. En quella duajan interpresas e chasadas cun in diever da 50 uras megawatt ad onn restar en il provediment da basa. Per proteger las consumentas ed ils consuments vul il Cussegl federal lantschar ina plattafurma da cumparegliaziun. Analog al sectur da telecommunicaziun duai plinavant vegnir stgaffì in post da mediaziun.
Dapi il december è conuschent ch’il martgà d’electricitad duai vegnir avert cumplainamain, uschia che mintga consument po tscherner sez ses furnitur d’electricitad. Questa discussiun datti gia da ditg – il 2002 ha la populaziun svizra dentant anc ditg na a la votaziun. Pli tard è il martgà vegnì liberalisà per fatschentas grondas.
Repower sustegna liberalisaziun dal martgà d'energia
La Repower sustegna la liberalisaziun dal martgà, ha il CEO Roland Leuenberger ditg envers il schurnal regiunal da SRF. Tenor el avess questa cunvegna in meglier access als martgas europeics e sustegness uschia il provediment segir e da furmar reservas.
Tenor Roland Leuenberger avess questa cunvegna segir in'influenza sin ils pretschs. Sche quels van si u giu saja grev da dir.
Actualmain vegnia il pretsch da la Repower mess ensemen suandantamain: ils custs da producziun plus in gudogn ch'il stadi regulescha. Quai ston ils clients e las clientas pajar actualmain, en futur fissan els libers da tscherner il furnitur.
Quai fissan concurrents da la Repower, tuttina è il CEO per la liberalisaziun. Da l’autra vart avess la Repower era la schanza da vender l’atgna electricitad en auters pajais. Gia uss han els clients e clientas en l'Italia e lavuran pia gia en in martgà liber. Ch’ils martgas da l’Uniun europeica e la Svizras vegnan liberalisads, capita tenor Roland Leuenberger il pli baud il 2030.
Niz è dispitaivel
L'electricitad che vegn ord nossas bischlas da contact n’è betg adina d'ovras svizras, mabain po era vegnir da l’exteriur. La Svizra n’è numnadamain betg in’insla. Ella è integrada ella rait d'electricitad europeica. Passa 40 lingias d’auta tensiun mainan sur cunfin. Almain fisicamain è la Svizra uschia gia colliada cun ils pajais vischins. Mo ella ha strusch la pussaivladad d'influenzar quai che schabegia sin quella rait paneuropeica.
Gist perquai vul il Cussegl federal ina cunvegna el sectur da l'electricitad cun l'Uniun europeica. Dapi la fin da l’onn passa è quella negoziada, e malgrà ch'ils detagls n’èn anc betg enconuschents ha il Cussegl federal gia preschentà ils resultats generals.
Segirtad e commerzi sur cunfin
Dus puncts èn centrals. La cunvegna d'electricitad duai meglierar la segirtad dal provediment e la stabilitad da la rait electrica en Svizra ed era migliurar l’access da la Svizra a las organisaziuns e plattafurmas europeicas. Plinavant duai la cunvegna segirar e levgiar il commerzi cun electricitad sur cunfin.
La Swissgrid ch'administrescha la rait da transmissiun en Svizra duain cun la cunvegna survegnir access cumplain tier las organisaziuns e las plattafurmas europeicas. Quai gida da coordinar meglier il transport dal l’electricitad ed uschia d'evitar surchargias u era blackouts. Ils pajais vischins na dastgan era betg restrenscher las capacitads da transport en Svizra e viceversa.
Liberalisar martgà svizzer
La Svizra sto persuenter liberalisar pli fitg l’agen martga d'electricitad, uschia che tut ils consuments pon decider sez da tgi ch'i vulan retrair l'electricitad. E quai che pertutga las ovras idraulicas duain quellas vinavant dastgar restar en il maun public e la Svizra po decider a moda autonoma davart il diever da las ovras sco era davart il tschains d'aua.
Per il Cussegl federal hajan ins cuntanschì las finamiras da negoziaziun. Damai che la cunvegna d'electricitad è vinavant pulit dispitaivla vegn la populaziun dentant il pli probabel a decider separà davart quella a l'urna. Il pli baud l'auter onn.