La presidenta da la Confederaziun Doris Leuthard ed il president argentin Mauricio Macri èn sa cunvegnids a Buenos Aires d'intensivar il commerzi tranter ils dus pajais. Tenor ina communicaziun dal Departament federal per ambient, traffic, energia e communicaziun duain cumenzar anc l'emprima mesadad da l'onn tractativas per ina cunvegna da commerzi liber tranter il martgà naziunal sidamerican Mercosur e la zona da commerzi liber europeica Efta.
Ina collavuraziun pli stretga fetschia er senn en autras spartas sco per exempel en la protecziun da l'ambient, la scienza, la giustia, l'infrastructura ed era tar las finanzas e cun l'UNO. L'Argentina e la Svizra partian valurs ed ideas centralas. Els stattan sin palc internaziunal omadus per avertadad, cooperaziun e dialog.
In impurtant partenari
Radund 16'000 Svizras e Svizzers vivan tenor UVEK en l'Argentina. Cun quai furman els la pli gronda cuminanza da Svizzers da l'exteriur en l'America latina. Il pajais è suenter Brasilia e Mexico il pli impurtant lieu per investiziuns per interpresas svizras en l'America latina.
RR novitads 06:00